Misteri Benteng Vastenberg

Kutha Solo pancen sawijining kutha ing Jawa Tengah kang nduweni patilasan sejarah kang akeh banget. Ing kutha kang kawentar minangka sebutan kutha bengawan iki akeh banget peninggalan-peninggalan wangunan sejarah kang arupa keraton. Saliyane iku ing kutha iki kaya dene kutha-kutha ing Indonesia uga bisa ditemoni sawetara paninggalane jaman Kolonial Walanda. Salah sawijining pannggalan bangsa Walanda kang nganti saiki isih bisa diprangguli yaiku Benteng Vastenberg.

Benteng Vastenberg iki mapan ana sacedhake keraton kasunanan Suarakarta. Yen dideleng wujude ngono kahanane benteng paninggalane bangsa walanda iku katon nrenyuhake banget. Jalaran katon ora krumat lan ana saka saperangan wewangunan benteng kasebut sing wis rusak. Yen dideleng saka blegere benteng vastenberg iki kawangun kanthi migunakake campuran arsitektur Walanda lan uga migunakake arsitektur Jawa.

Ngenani anane campuran arsitektur Jawa bisa kabukti kanthi anane arca penjaga kang diwangun ing scedhake lawangane benteng. Saliyane iku ing ngarepe benteng iki uga ana patung nandi cacah loro. Benteng Vastenberg kang ana ing kutha Solo iki pancen nduweni sejarah kang dawa. Benteng iki mulane diwangun kanthi pangajab bangsa Walanda bisa meruhi sekabehane tumindak kang bakal ditindakake dening Keraton kasunanan Surakarta. Benteng iki uga mirip klawan benteng-benteng liyane ing kene uga tinemu anane parit-parit perlindungan kang digunakake kanggo ngredhem gempuran saka pihak musuh.

Benteng Vastenberg diwangun kanthi anane printah saka Gubernur Van Der Berg sing wektu iku minangka pepundene bangsa walanda kang manggon ana Indonesia. Benteng iki diwangun rikala taun 1774 lan rampung rikala taun 1779. Sawise indonesia mardika sabanjure benteng iki digunakake kanggo markas Brigif VI Kostrad. Kedadeyan kang nrenyuhake tumrap benteng iki kawiwitan rikala taun 1991.

Nalika taun 1991 benteng iki ditukargulingake klawan pihak swasta lan lemah kang ana ing kono dikapling-kapling dadi wolung perangan. Malah ing taun 2008 benteng kang ngandhut sejarah iki bakal dirubuhake lan bakal diganti dening sawijining hotel tingkat telulas. Untunge para budayawan lan sejarawan solo wektu iku bisa menggak kedadeyan kasebut.

Nanging ing sawalike sejarah ngenani benteng tinggalane walanda kasebut akeh crita-crita ora tinemu nalar kang kerep dumadi ing benteng Vastenberg iki. Ngenani kedadeyan kang ora tinemu nalar kasebut diandharake dening Kahono sawijining bakul asongan kang kerep ngedol dodolane ana sakupenge benteng.

Miturut kang diandharake dening Kahono ing benteng kuwi saben-saben malem jemuah kliwon lan malem selasa kliwon kerep keprungu swara-swara nyalawadi kang kawetu saka njero benteng. Kadhang kala swara kang kawetu saka njero benteng iku memper swarane pawongan kang lagi baris. Saliyane kuwi uga kerep banget keprungu swarane wong wedok nangis.

Kahono uga nambahake yen samungkure keprungu wanita nangis ora watara suwe mesthi katon kaya ana klibate wanita walanda jumangkah mlebu menyang sawijining papan sing biyen digunakake kanggo rapat klawan bangsa Walanda. Saliyane iku miturut apa sing dicritakake dening Kahono ing wektu purnamasidhi biyasane kaya ana sesawangan kayadene tentara kang lagi baris. Lan kadhang  kala ana uga penampakane jendral bangsa walanda. Wewayangan kaseut dpercaya minangka wewayangane bangsa walanda jalaran dedeg piyadege luwih dhuwur tinimbang bangsa Indonesia lan saka sandhang penganggone cetha yen iku dudu tentara Indonesia. Kawetu sesawangan aneh kasebut biyasane kawiwitan nalika cahyane rembulan tumiba ing pojok-pojokaning benteng. Kerepe anane sesawangan kang ora tinemu nalar kasebut yen miturut Kahono dumadi jalaran nalika dhek jaman perang kemerdekaan biyen akeh tentara Walanda kang nemahi pati ing laladan kono lan ora dikuburake kanthi samesthine.

Ngenani wewayangan Jendral bangsa Walanda kang kadhang kala ngaton saka benteng kasebut para warga kang ana sakupenge benteng sing kadhang kala sok ngaton iku dipercaya dening masyarakat minangka arwahe Jendral Van Der Berg sing penasaran.